കേരള രാഷ്ട്രീയത്തെ പിടിച്ചുകുലുക്കിയ ടി.പി. ചന്ദ്രശേഖരൻ വധക്കേസ് അന്വേഷണത്തിലെ നിർണായക മുഖമായിരുന്ന എ.പി. ഷൗക്കത്തലിയെ കോഴിക്കോട് സിറ്റി പോലീസ് കമ്മീഷണറായി നിയമിച്ചുകൊണ്ട് യു.ഡി.എഫ് സർക്കാരിന്റെ ശക്തമായ രാഷ്ട്രീയ നീക്കം. സി.പി.എമ്മിന്റെ കണ്ണൂർ, കോഴിക്കോട് ശക്തികേന്ദ്രങ്ങളെ പ്രതിരോധത്തിലാക്കാൻ ലക്ഷ്യമിട്ടാണ് ആഭ്യന്തര വകുപ്പിന്റെ ഈ അടിയന്തര ഇടപെടലെന്നാണ് രാഷ്ട്രീയ വിലയിരുത്തൽ.
സർക്കിൾ ഓഫീസുകൾ തിരിച്ചുവരുന്നു; സ്റ്റേഷൻ ചുമതല ഇനി എസ്.ഐമാർക്ക്; കേരള പോലീസിൽ വൻ അഴിച്ചുപണി
ടി.പി. കേസ് അന്വേഷണ ഘട്ടത്തിൽ സി.പി.എം നേതൃത്വത്തെ അപ്പാടെ വിറപ്പിച്ച ഉദ്യോഗസ്ഥനെ വീണ്ടും മലബാറിലെ പ്രധാന തസ്തികയിലേക്ക് മണ്ണെണ്ണിയെടുത്ത് പ്രതിഷ്ഠിക്കുന്നതിലൂടെ കൃത്യമായ രാഷ്ട്രീയ സന്ദേശമാണ് യു.ഡി.എഫ് മുന്നോട്ട് വയ്ക്കുന്നത്.
മുടക്കോഴി മലയിലെ ആ അർദ്ധരാത്രി റെയ്ഡ്
കേസിലെ ഒന്നാം പ്രതിയായ കൊടി സുനി അടക്കമുള്ള അക്രമിസംഘം ഒളിവിൽ കഴിഞ്ഞിരുന്ന കണ്ണൂരിലെ മുടക്കോഴി മല വളഞ്ഞ് സാഹസികമായി അവരെ പിടികൂടിയത് ഷൗക്കത്തലിയുടെ നേതൃത്വത്തിലുള്ള പ്രത്യേക സംഘമായിരുന്നു. പാർട്ടി സംരക്ഷണയിൽ കഴിഞ്ഞിരുന്ന ക്രിമിനലുകളെ പോലീസിന്റെ സകല കരുത്തും ഉപയോഗിച്ച് വലയിലാക്കിയ ഈ ഓപ്പറേഷൻ അന്ന് വലിയ വാർത്തയായിരുന്നു.
‘ഓപ്പറേഷൻ തൂഫാൻ’ ശക്തം; പൊലീസിനെ വെട്ടിച്ച് ലഹരിക്കടത്തിന് പുതിയ തന്ത്രങ്ങളുമായി മാഫിയ
പി. മോഹനന്റെ നടുറോഡിലെ അറസ്റ്റ്
ടി.പി കേസിലെ ഗൂഢാലോചനയുമായി ബന്ധപ്പെട്ട് അന്നത്തെ സി.പി.എം കോഴിക്കോട് ജില്ലാ സെക്രട്ടേറിയറ്റ് അംഗമായിരുന്ന (പിന്നീട് ജില്ലാ സെക്രട്ടറി) പി. മോഹനനെ തടഞ്ഞുനിർത്തി അറസ്റ്റ് ചെയ്തതായിരുന്നു ഷൗക്കത്തലിയുടെ മറ്റൊരു നിർണായക നീക്കം. ഒഞ്ചിയത്തിനടുത്ത് വച്ച് മോഹനൻ സഞ്ചരിച്ചിരുന്ന കാർ നടുറോഡിൽ തടഞ്ഞുനിർത്തിയായിരുന്നു പോലീസ് അന്ന് കസ്റ്റഡിയിലെടുത്തത്. പാർട്ടിയുടെ സമുന്നതനായ ഒരു നേതാവിനെതിരെ ഇത്രയും ശക്തമായ നടപടിയെടുക്കാൻ കാണിച്ച ആർജ്ജവം അന്ന് യു.ഡി.എഫ് സർക്കാരിന് വലിയ രാഷ്ട്രീയ മൈലേജ് നൽകിയിരുന്നു.
ലക്ഷ്യം രാഷ്ട്രീയ മേധാവിത്വമോ?
കോഴിക്കോട്, കണ്ണൂർ ജില്ലകളിൽ നിലനിൽക്കുന്ന പ്രത്യേക രാഷ്ട്രീയ സാഹചര്യത്തിൽ, പാർട്ടി ഗുണ്ടാസംഘങ്ങൾക്കെതിരെയും രാഷ്ട്രീയ അക്രമങ്ങൾക്കെതിരെയും ശക്തമായ നടപടിയെടുക്കാൻ ഷൗക്കത്തലിയെപ്പോലൊരു ഉദ്യോഗസ്ഥന്റെ സാന്നിധ്യം സഹായിക്കുമെന്നാണ് യു.ഡി.എഫ് കണക്കുകൂട്ടുന്നത്. നിയമവാഴ്ച കർശനമാക്കുക എന്നതിനൊപ്പം തന്നെ, മലബാറിലെ സി.പി.എമ്മിന്റെ രാഷ്ട്രീയ നീക്കങ്ങൾക്ക് തടയിടാൻ കെൽപ്പുള്ള ഉദ്യോഗസ്ഥനെത്തന്നെ രംഗത്തിറക്കുക എന്ന തന്ത്രപരമായ തീരുമാനമാണ് യു.ഡി.എഫ് കൈക്കൊണ്ടിരിക്കുന്നത്
