ചായയിൽ പഞ്ചസാര ഒഴിവാക്കിയാൽ പ്രമേഹം വരില്ലേ?

പ്രമേഹത്തെ പടിക്കു പുറത്താക്കി” എന്ന് സ്വയം ആശ്വസിക്കുന്നവരാണോ നിങ്ങൾ? എങ്കിൽ നിങ്ങൾക്ക് തെറ്റി. ഇന്നത്തെ കാലത്ത് പ്രമേഹത്തെ പ്രതിരോധിക്കാൻ ആളുകൾ കണ്ടെത്തുന്ന ഏറ്റവും എളുപ്പമുള്ള വഴി ചായയിലെയും കാപ്പിയിലെയും മധുരം ഒഴിവാക്കുക എന്നതാണ്. എന്നാൽ ഈ ധാരണ തികച്ചും തെറ്റാണെന്നും മധുരം ഉപേക്ഷിച്ചതുകൊണ്ട് മാത്രം നിങ്ങൾ പ്രമേഹത്തിൽ നിന്ന് സുരക്ഷിതരാകുന്നില്ലെന്നും മുന്നറിയിപ്പ് നൽകുകയാണ് ആരോഗ്യ വിദഗ്ധർ.

Also Read രാത്രി കിടക്കുന്നതിന് മുൻപ് പാൽ കുടിക്കുന്നത് നല്ലതാണോ?

പഞ്ചസാര ഇടാതെ ചായ കുടിക്കുന്ന എത്രയോ യുവാക്കൾ ഇന്ന് പ്രമേഹ ബാധിതരാകുന്നുണ്ടെന്ന് കണക്കുകൾ ചൂണ്ടിക്കാണിക്കുന്നു. ഭക്ഷണത്തിലെ മധുരം കുറയ്ക്കുന്നത് നല്ലതുതന്നെ, എന്നാൽ രക്തത്തിലെ പഞ്ചസാരയുടെ അളവിനെ നിയന്ത്രിക്കുന്നതിൽ ഇതിലും പ്രധാനപ്പെട്ട മറ്റു ചില ഘടകങ്ങളുണ്ടെന്ന് വിദഗ്ധർ പറയുന്നു.

പ്രമേഹം വെറും മധുരത്തിന്റെ മാത്രം പ്രശ്നമല്ല

നിങ്ങൾ മണിക്കൂറുകളോളം ഒരേ ഇരുപ്പ് ഇരിക്കുന്ന ആളാണോ? എങ്കിൽ അതൊരു വില്ലനാണ്. കംപ്യൂട്ടറിന് മുന്നിലും ഓഫീസിലുമായി തുടർച്ചയായി ഇരിക്കുന്നത് നമ്മുടെ ശരീരത്തിന്റെ ഉപാപചയ പ്രവർത്തനങ്ങളെ പാടേ തകിടം മറിക്കും. ദീർഘനേരം അനങ്ങാതെ ഇരിക്കുമ്പോൾ ശരീരത്തിലെ ഇൻസുലിൻ ശരിയായി പ്രവർത്തിക്കാതാവുകയും കോശങ്ങൾ ഇൻസുലിൻ പ്രതിരോധം കാണിക്കുകയും ചെയ്യുന്നു. പേശികൾക്ക് ചലനമില്ലാതാകുമ്പോൾ അവ രക്തത്തിൽ നിന്ന് ഗ്ലൂക്കോസ് ആഗിരണം ചെയ്യുന്നത് നിർത്തും. ഫലമോ, നിങ്ങൾ മിഠായിയോ മധുരമോ തൊട്ടില്ലെങ്കിൽ പോലും ശരീരം പ്രമേഹത്തിലേക്ക് വഴുതിവീഴും. പുകവലി പോലെ തന്നെ അപകടകരമാണ് ഈ തുടർച്ചയായ ഇരിപ്പ്.

ഉറക്കമില്ലായ്മയും മാനസിക സമ്മർദവും

പഞ്ചസാരയേക്കാൾ വലിയ ശത്രുക്കളാണ് ഉറക്കക്കുറവും സമ്മർദവും. രാത്രി വൈകി മൊബൈൽ ഫോണിൽ സ്ക്രോൾ ചെയ്യുന്നതും ആവശ്യത്തിന് ഉറങ്ങാതിരിക്കുന്നതും ഇൻസുലിൻ ഉൽപ്പാദനത്തെ ബാധിക്കും. അതുപോലെ തന്നെ വിട്ടുമാറാത്ത മാനസിക സമ്മർദം ശരീരത്തിൽ കോർട്ടിസോ ഹോർമോണിന്റെ അളവ് കൂട്ടുന്നു. കോർട്ടിസോൾ കൂടുന്നത് വഴി കരൾ കൂടുതൽ ഗ്ലൂക്കോസ് രക്തത്തിലേക്ക് പുറന്തള്ളും.